Eggjalaus súkkulaðikaka með súkkulaðikremi

Þessa súkkulaðiköku gerðum við í áfanga sem heitir "Sérfærði og matur við sérstök tækifæri". Þessi uppskrift er eggjalaus og hentar því vel fyrir þá sem eru með eggjaofnæmi. Í staðinn fyrir egg er hvítvínsedik notað. Uppskriftin er mjög stór og hentar því vel í skúffu eða í tvö form ca 20*30 cm stór. Hlutverk eggja í bakstri er margur en þar má nefna að þau hjálpa til með lyftingu, raka, bragð, bindingu hráefna, og eggjarauðan gefur mýkri áferð.

Hægt er að nota önnur hráefni í stað eggja t.d. edik, eplamauk, avocado, banana, kjúklingabaunir, chia fræ bleytt í vatni, hnetusmjör og vegan jógúrt.

Auðvelt er að fara eftir uppskriftinni og bökunartíminn er um 1 klst. Kakan er virkilega góð og er einnig svoldið þétt í sér og hentar því vel til að skreyta t.d. fyrir afmæli, þar sem hún molnar ekki mikið. Þar sem bökunartíminn er frekar langur hentar þessi ef til vill ekki í kennslu.

Stillið ofninn á 180 gráður á undir og yfirhita (ekki blástur)

Kökubotnar:

450 g hveiti

6 msk kakó

2 tsk lyftiduft

2 tsk matarsódi

300 g sykur

125 ml matarolía

300 ml vatn

2 msk hvítvínsedik

2 tsk vanilludropar

Aðferð:

1. Forhitið ofninn í 180 gráður.

2. Sigtið saman hveiti, kakó, lyftidufti og matarsóda í stóra skál og blandið sykri saman við.

3. Blandið öllum vökva og olíu saman í aðra skál.

4. Hellið vökvablöndunni saman við þurrefnin í einu lagi og hrærið rólega þar til deigið er mjúkt og kekkjalaust, bætið við vatni ef þarf.

5. Setjið deigið í bökunarpappírsklætt form og bakið í um það bil 60 mínútur eða þar til að prjónn sem stunginn er í kökuna kemur þurr út.

6. Takið kökuna úr forminu og kælið.

   +

Krem yfir kökuna:

4 dl flórsykur

4 msk kakó

75 g smjör

1 msk sýróp

4 msk kaffirjómi

Aðferð:

1. Sigtið saman flórsykur og kakó.

2. Hitið við vægan hita í litlum potti smjör, sýróp og kaffirjóma þar til smjörið er bráðnað.

3. Hellið þá vökvanum út í þurrefnin og hrærið þangað til kremið er mjúkt og kekkjalaust.

4. Hrærið áfram rösklega með trésleif þar til kremið hefur kólnað aðeins og þykknað.

5. Smyrjið snyrtilega yfir kökuna.